Kigeena-wageena kouko okeyai kenekaa wiya kou maki okogoo enaida nakaa aumiyake-atoyake eikegai... owaage wouyookai enaimoo-wakouyookai enaimoo eegoo wadoo eete, wadougagaadaninakaa okeyai bugiida make owaapa auweete kodo wadouyoo dimi watiya-watiyaidaa nakaamake okeyaiya owaapa yamo aadoopaiya, owaakodo nakagi wagaa-wagaa teiyogoo………
Owaa damouto makeko mana aduwayaaweegai; `kiiwoo owaadobakaakiike yame topi naa yagamo topa naa inaiko inaibugaiya bukaa naatai awegakumeegai`
Kabouto make wooaadoopaiya, yame enakii nota/nomo yoo kotuu timake teiyogoo…… adigaagaa nakaa, yame panekamee kidaa auwee metamee kidi `nai akiki kapako beu` eteegi…… yame metamee kidaako, `ii aniki kiiga woo` eteegi, `aweetaako uwiitagekaa eteegi` yame metamee kidaa……. Yame panekamee kidi okai pekatoo badee-badee teegi, okaiya dimi dobaigatoo dimi ko `ao kagi keeyokaa nigaamakigi kii` gaayake teegi……
Beukookaa, yame panekamee kidaa `enaakaa ikaiwiyaa auwai` eteegi, yame metamee kidaa mana yoko yadaimaiko `beu-beu, akima enaimoo uwiitage kaa` eteegi….. kou unuu okeyai yame wiyaa akaiyee-nakaiyee eete abata awiidaguudakeiyogoo kookaa, yame metamee kidaa `enaa api, akipaneka ki tounee teegino inaiko nauwi` eteegi….. okeyai kabouto wakouyoo aakiyakee wakouyo yuuda make yame panekamee ouweete meekidaa ` enaakaa tumi kiyaweyake titoupagekaa dootou` etidokeegi………
Okeyaiya auwipai ko akiki epi……….? Okai kiidakidaa umiitou-toutou teete wadouyoodani nakaa migo yigi kookaa dagi ginadootiyakee doopi manaakidaa, kedi taka apeiyoo takaanitouyogoo…… `aoo anikidiki anipaneka kodoko teedooyakee woobokamakiga kii` gaayaaweegi…….
Kii uwaataa okai nomo teki-teki teegi, waneeyatoki okai owaapa wadouyoo…… kou unuu umiyaawiyakee aweetaa abataato ki okai kiigawoo ita pati ateegi…. Wouyoogaa nakaa doopi ya kagi kou kinou piyaa ko koma wegii kodo enaa keitita nakoko kiiga woo wooakakotope-kotope titouyogoo…… wadogaapiya `aoo kouko tumi eneetegi kodo kipaigaakaa` gaayaaweegi….. okai kiikiditoo peeyakee uweegi. Uwaataa tani digi-digi doba wouwee kebouda nakaa woodopiya kouwouwee owaa ena kou touyogoo. Kou owaadoba mee beutotouyogoo kookaa okai owaadoba wouyookaitoo, odigaagaa nakaa yamo yuuda piya tuguu kookaa doopiya owaimeewadouyoo keegi…….
Odigaadani nakaa owaimee kidaa `kokee akiki kaiyaigaa` eteegi….. yokaagaa kidaako `aniki kou anipaneka nako` amooteegi….. `oo kagipaidabaa, kou miyogaakaa wookato kou keiyoko, aweetaa tani tegemidaida kiiya podomipeko, okeiya owaapaa ko uwaataa digimaineeki digi tabaawiya etigaibeuda kiiyaa dakiitaitage` owaimee kidaa eteegi. Kou unuu okeyai kiimana-koumana awegaatedoba kodaa `kokee, yagamo beukitouyoko anipanekaane okei widodani topaikookaa` owaimee kidaa auwee yokaagaa kidi kou amooteegi…… yokaagaakidi mana ma beu koukodo uno umidoke teegi……..
Yokaagaa kidi aweetaato abatama kiigawoo uweegi, uwaataa kabuudaa miyouyoo nakaamake wooyuwee tipiya, yoka niinogee ko gapaapaiga makidaa teegi…… kapa2 wouwe tiyakee edoopiya, kei yoka imoona aikoo keiko wakoo keikee teiyogoo…… kii pini, meekiitoo ibookita yokaa nakiya `oo kiike potokaa naamaa kidi kipigaakaa` eteegi….. kiiyokaa koudakuduga igadoke teegi….. Okai kiikebouda kidaa animakiyake waiko nakaa woodoo tipiya wakiyoo daninakiki wakii-wakii teitiginoo gaagi…. Epidoo tipiya nogei maakoda waki-waki ki epa maki menidaa teegi. Kii kebouda kidaamake kiikiditoo dootaa-dootaa teetegaa kidaa kidaa meeko yiiwuu-yegeewuu yuwidaa teegi. Kou yegee kapaakee miyoo teega. Wadogai-gaitipiya panekamee manawuu miyokatoo keega……
Okai egaa owaadobakeegi, ibopooki toubeugaa kidaa kou yame baakamee kidima yagamo panekamee kodoma wadouyoo. Kouda okei yegeakaate teegai. `kokee, kei akaamaamaa keike mapega wagiipigai yuwakaa, ee kagi namaadabaa-naamaadabaa` etii iteega…. Maakodo kou mana kodaa ebadikumitaa, tikaagoo nipoo ki kidaa pini meetoo ibookita yokaa kidaa etike tapa enamage tiyaaweegi. Amakamee kidi, panekamee kodaa etita dani `ee kagi naamaadabaa-naamaadabaa` teeyamoo teegi, koudani too keiyoka makiyoo idimaa mapega nanatoo teete kiowaaetike mapega kaa tipi teegi……
Pini yokaakidaa, `nai, ikaamaa naki mepitoo kiikegaita nomo, kiiyouta ekinaa niteeige kidi niikegai, niiyouti` eteegi. Nakame kidaa `enaano ikaamaa ma uwiyakee kegai-ekogaiteuwei` eteegi….. kou okei uwiyakee doopiya, nogei nomo enatoo dobaa ena yinimakitouyo, koukodo aneima-aneima tiyakee okei kou nomoo badimakeegai. Woutoo nakaa doopiya, ekina enakouko bubukamakitouyogoo, epeedootipiya, nogei okaiya deto ko akakotope titouyogoo. Kou ekinaa kouda dogiyai tootetoo tiyaaweegai…… kou unuu kou ekina maida wadougaa-miyougaa teegai. Eh puya, kou ekinaa amoonako kidaa amakamee, panekamee kiikidi baakamee kidi auweeyaaweegai.Kou unuu kodaa panekamee kodo megee, ekina uka ena ma yame ena ma, megeudee ma, amakaane kedaa mege kotuu koudani yateegai….
Aweetaa abataato ko okaiya uwita itaa akiki epi, okai kiiga yamo uweegi. Kidaa miyo meta itaidaa kidigaki uwii beu tiyake yokoutoo kego makiidaiga yamo kotuwaagi…. Wakouyoogaa nakaa keiyogoo, kou kegotakaidaiga degee-wigiyai tita apii ena kouko touyogoo…. Kou yagamo mana etiima beu okai yamokato too teegi, yamodani nakaa okai ee duwainee animakiyakee woodootipiya, kou yagamoo okai badouto epeedokitouyogoo….. okai mana etiima beu, ekina, nomo kodo gidimake tiyake okai noogi, yagamokodo kou naanooti koumaiya beu, `motiyake nootipako nootaipiga, beukipako beu` okaikoutoo gaayake teegi….. okai, ita patiwaagi, tuge wouwi ko unoona umidokita kou yamouwii ko uwaataa digimidaida okaiya owaapa wadouyoo keegi. Kou wanee okai mogo, iye, piye teegi ekona kodo dakimainee tiyakee. Yagamoko naekowaatai manaa kounaa beu, koyaa naatootai manaakounaa beu, okaikidi wouyookigi-wakouyookigi too tiyakee mumai tiyaaweegi….. yagamo kodo okai didee amoyamakiyaaweegi, okaidani naa makiyaaweegi.
Kouda okai umiitou-toutou teete doba kodaa kou yagamo kodo mana pati tipa manaakodaa `akiya i
yootoo weewee ko woyako beu kaa aninaa aniya iyoo weinee kaa bugi bodiya nayou` eteega…. Kou maakoda aweetaato okai dobaa ena kou piya yakobii, bodiya yayou timakeegi…. Nogei naago wido kouko umigoo yamaawiyake kodaa bugi dobaa keiyatita kodo yadoopiya keidakaa yegeki yegee tumaiyaa keitoo wedoo titouyogoo, yegee notaiyoo, yegee etouyoo, yegee naapouyoo, yegee yatuuyoo, yegee mapiiyoo, kagi noogei kouyagamoo okai keiyoudoo kou dobaa tipi atitouyogoo. Kou aadaba tiyaaweegi.
Wadodanigaa nakaa kidaa yokaagaa kidi kedaa anaamaamaakedepa uwiigoupiga gaagi… kou unuu okai be ma umikumeegi, aweetaa tani tegemidaida okai ita kiigawoo uweegi. Uwaata-uwaataa waiko kebouda kidaa dakii teegi, okai kidaa miyo doota wakiyoo-wakiyoo kiditoo kiiuwaataa dootaa-dootaa too tiyaaweegi. Panekamee bakaamee wiyaakaa manaa eteitipai komaiya aadabatoo tiyakee okaiki kiikiditoo dootaa-dootaa too tiyakee panekamee kodo eugaa kumi gaadoke tiyakee epoge etuwayaa weete manaa ko` poo, kouko okei tonawi kiibago-koubagoo komaiya gaadoo teigai yamake teduwaigai no akidani kiike duwayaa` naako epoge etuwayake teega. Beu okaiki kiikidi maidatoo teege. Wane maakodo tedoomakeida makeko okai owaadoba wouyookeegi. Kiiunuu okaiki awiyaati yeii kidi umikumeegi……
Aweetaa abataato okai kidaa wakiyoo-wakiyoo kidi peete okai kiiga woo ita patiwaagi, wouyoo epa watiyaa nakaa dakiitipiya, kouya okai epeedokita yagamoo kodo touyogoo, kou yagamookodaa `enaakaa aki uukaa meegekaa kouwoo ipuwee bagee kou akigaipage manaa etidokii` eteega. Kou okai wookato. Nogei, miyoutoodani nakaamake wadodootipiya, kii eke tegeedani kiigawado epaayokaa menidoo tiyakee kii wakiyoo kidiki waiko eguuda aitoo keikee-yokoutoo keikee teiyogooo, okai kou dooyaawiitoo, kiigawoo wookato, tuge nogei woutoo okai maakodo epaapaa doopiya, kodaa epeedokita yagamoo kododani degee-wigiyai tita yagamoo okeiyaiwiyanaa kou epaapa atotouyogoo… yokaagaakidaa `aniki kiiwado kii` eteegi. Kou api wiyaa manatagu pekatoo amo aadookumeegai…..
Yokaagaakidi, kiiga wado tagumeegi….uweete-uweete waiko yakimakaineida make miyogotoo tiyakee miyodanigaa make, `ee kagi anidani kou kii teduwaiki` gaayakee wadu metaato wado tagumeegi…… nogei, tagumipi manaakidaa kiiwaiko kii wakiyoo-wakiyoo kidi koya gane tagiatiyakee okaiya agiyaage yakaaweegi….. koudame okai miyouwiitoo, wako epaapa kipiya, kodaa yagamo wiyaa kodo totouyogoo.
Kou yagamouyaa kodaa, `inaiyako beu kaa ipuweemee pa kuugakaa waiko uwii` aateegai. Maakodo kouda itatotouyogoo kookaa kouitaa kodo peedoke okai kiiga woo uweegi. Tuge waiko mogo damoutoo nakaa doopiya, kou yagamo okai epeedokita kodo totouyogoo, kou yagamokodaa ` ipuweemee ki kiiyakaa woo okaiya kadani katiipagi ye akikidaa eyuwai` eteega. Manama beu Okai wookato, wouyoogaa nakaa yuwipiya, manatoo ewaida meekaako ` aniyoka, koyaa mei, aniki akaitai koukodo akuukai, koukodo akauwai, koukodo akipaneka, koukodo akiweneka` manaa ko yukuma gapatuku keega. Nogei, kouda okai tootetoo, wooyonai ma kaga-yamoyoonai ma kaga. Iboopootoubeugaa nakaa doopiya kou auwee ape doba kaa igamakita mee ki okaipa yoodoke teiyogoo. Kii apedobakaa adamaa kidaa `kokee, aki kiidakaa ita uweete umidokitaidakaa yagamo beukipeko yagamo widodani topaikookaa kateegi kii akiya enaa eteege naaki kii teduwatoyaa, daana kiidakaa aki tagumeeteidamake miyouwitaa teege kiike kiidakaa aki yagamo kodo weda egaayake aito-yokoutouga kotuwaage kiiya miyoo gotoo teege`. Idima-idima ko akiki enaa aweege no koyaa aniya owaadoba kouya umitou-toutou naateeti` etita…… koukeitita nu………….!!!!
Semoga bermanfaat!!!!!
Bila ingin ditranslate, pasti bias tp butuh waktu…!!!
Tidak ada komentar:
Posting Komentar